Канон воскресн, Песнь 1

Ирмос: Ма́нием Твои́м / на земны́й о́браз преложи́ся / пре́жде удоборазлива́емое / водно́е естество́, Го́споди. / Темже немо́кренно пешеше́ствовав Изра́иль, / пое́т Тебе́ песнь побе́дную.

Канон воскресен

Осуди́ся сме́ртное мучи́тельство дре́вом, / непра́ведною сме́ртию осужде́ну Ти, Го́споди: / отню́дуже князь тьмы Тебе́ не одоле́в, / пра́ведно изгна́н бысть.

Ад Тебе́ прибли́жися, / и зубы́ не возмо́г сте́рти те́ло Твое́,/ челюстьми́ сокруши́ся. / Отню́дуже Спа́се, боле́зни разру́ш сме́ртныя, / воскре́сл еси́ тридне́вен.

Ин канон крестовоскресн

Два исто́чника нам на кресте́ источи́ Спас живоно́сная / от Своего́ прободе́ннаго ребра́. / Пои́м Ему́: я́ко просла́вися.

Во гроб всели́вся, и воскре́с тридне́вен, / нетле́ние подаде́, ча́яние Христо́с сме́ртным. / Пои́м Ему́: я́ко просла́вися.

Ин канон, Пресвятей Богоро́дице

Стрело́ю грехо́вною уя́звлены нас Сло́во ви́дев, / я́ко Благоде́тель уще́дри: / отню́дуже несказа́нно соедини́ся, Всечи́стая, пло́тию, / и́же из Тебе́ Пребоже́ственный.

Бысть сме́ртию я́то естество́, / тле́нное же и ме́ртвенное челове́ческое, Влады́чице: / Ты же, жизнь заче́нши, / сие́ от истле́ния к животу́ возвела́ еси́.

Песнь 3

Ирмос: В нача́ле Небеса́ / всеси́льным Сло́вом Твои́м утвержде́й Го́споди Спа́се, / и Вседе́тельным и Бо́жиим Ду́хом, / всю си́лу их, / на недви́жимем мя ка́мени / испове́дания Твоего́ утверди́.

Канон воскресен

Ты возше́д на дре́во, / о нас боле́знуеши во́лею, благоутро́бне Спа́се, / и терпи́ши я́зву, примире́ния хода́тайственну, и спасе́ния ве́рным: / е́юже Твоему́, Ми́лостиве, вси примири́хомся Роди́телю.

Ты мя очи́стив от я́звы, / душе́ю уя́звленнаго зми́евым угрызе́нием, Христе́, / и показа́л еси́ свет, во тьме дре́вле мне слежа́щу и во тле́нии: / кресто́м бо во ад соше́д, мене́ совоскреси́л еси́.

Другий канон, крестовоскресен.

Иже на кресте́ стра́сти претерпе́вый, / и разбо́йнику рай отве́рзый, я́ко благоде́тель и Бог, / утверди мой ум в волю Твою, едине Человеколюбче.

Воскресы́й тридне́вен из гро́ба, / и живо́т ми́рови возсиявый, я́ко жизнодавец и Бог, / утверди́ мой ум в во́лю Твою́, еди́не Человеколю́бче.

Ин канон, Пресвятей Богоро́дице

Змий поползы́й из Еде́ма, / мене́ обоже́ния жела́нием прельсти́в, ве́рже в зе́млю: / но Иже ми́лостив, и естество́м благоутро́бен, уще́дрив богосоде́ла, / во чре́во Твое́ все́лься, и подо́бен мне быв, Ма́ти Де́во.

Благослове́н плод Твоего́ чре́ва, Де́во Богоро́дице, всех ра́досте, / ра́дость бо всему́ ми́ру родила́ еси́, и весе́лие вои́стинну / разгоня́ющее печа́ль грехо́вную, Богоневе́сто.

Песнь 4

Ирмос: Отча не́дра не оста́вль, / и соше́д на зе́млю, Христе́ Бо́же, / та́йну услы́шах / смотре́ния Твоего́, / и просла́вих Тя, Еди́не Человеколю́бче.

Канон воскресен

Своя́ плещи́ дав, и́же от Де́вы вопло́щься, на ра́ны, рабу́ прегреши́вшу, / бие́н быва́ет Влады́ка непови́нен, / разреша́я моя́ согреше́ния.

Предстоя́в суди́щу суди́й законопресту́пных, / я́ко осуди́мый пови́нен быва́ет, и зауша́ется бре́нною руко́ю, / созда́вый челове́ка я́ко Бог, и судя́й пра́ведно земли́.

Другий канон, крестовоскресен.

Не ве́дый греха́, и его́ ра́ди быв Го́споди, е́же не был еси́ вообража́ешися, / прие́м чу́ждее, да спасе́ши мир, / и убие́ши прельсти́в мучи́теля.

На кресте́ воздви́жен был еси́, / и пра́отца Ада́ма разреши́л еси́ грех / [его́же ра́ди Твою́ услы́шах си́лу:] / я́ко вся спасти́ пома́занныя Твоя́ прише́л еси́.

Ин канон, Пресвятей Богоро́дице

Избра́нная вся и до́брая, / я́вльшися Бо́гу пре́жде созда́ния све́тлостию, Всепе́тая, / светоли́тием Твои́м пою́щия Тя просвети́.

Бо́га челове́ком родила́ еси́, Чи́стая, / воплоще́нна от чи́стых крове́й Твои́х, / избавля́юща согреше́ний мно́гих, / любо́вию сла́вящия и почита́ющия Тя, Ма́ти Де́во.

Песнь 5

Ирмос: Нощь не светла́ неве́рным Христе́, / ве́рным же просвеще́ние в сла́дости слове́с Твои́х. / Сего́ ра́ди к Тебе́ у́тренюю, / и воспева́ю Твое́ Божество́.

Канон воскресен

За Твоя́ рабы́ продае́шися, Христе́, / и по лани́те ударе́ние терпи́ши, / свобо́де хода́тайственно пою́щим: / к Тебе́ у́тренюю, и воспева́ю Твое́ Божество́.

Боже́ственною Твое́ю си́лою, Христе́, / не́мощию плотско́ю кре́пкаго низложи́л еси́, / и победи́теля мя сме́рти, Спа́се, воскресе́нием показа́л еси́.

Другий канон, крестовоскресен.

Егда́ со беззако́нными вмени́вся, возне́слся еси́ на ло́бнем, / свети́ла сокрыва́хуся, и земля́ колеба́шеся, и церко́вная све́тлость раздра́ся, / евре́йское явля́ющи отпаде́ние.

Тебе́ разруши́вшаго мучи́телеву всю си́лу / кре́постию непостижи́маго Твоего́ Божества́, / и ме́ртвыя Твои́м воскресе́нием воздви́гшаго пе́сньми сла́вим.

Ин канон, Пресвятей Богоро́дице

Избавле́ние ве́чное Тобо́ю, Де́во, ны́не обре́тше / усе́рдно зове́м Ти: е́же ра́дуйся, Богоневе́стная: / и Твои́м све́том возра́довавшеся, Всепе́тая, пе́сньми Тя пое́м.

Еди́ну Тя Жени́х посреде́ те́рния крин, Де́во, обре́т, / чистоты́ блиста́нием светя́щуся, / и све́том де́вства, Всенепоро́чная, Неве́сту восприя́т.

Песнь 6

Ирмос: Пла́вающаго в молве́ / жите́йских попече́ний,/ с корабле́м потопля́ема грехи́, / и душетле́нному зве́рю примета́ема, / я́ко Ио́на, Христе́, вопию́ Ти: / из смертоно́сныя глубины́ возведи́ мя.

Канон воскресен

Воспомина́ху Тя заключе́нныя во а́де ду́ши, и оста́вльшияся пра́ведных, / и от Тебе́ спасе́ния моля́хуся: / е́же кресто́м, Христе́, по́дал еси́ преиспо́дним, / прише́д я́ко благоутро́бен.

Ко одушевле́нному Твоему́ и нерукотворе́нному хра́му, / разруше́ну бы́вшу страда́ньми, / воззре́ти па́ки лик апо́стольский отча́яся: / но па́че наде́жды покло́нься, / воскре́сша повсю́ду пропове́да.