Чтец: читает шестопсалмие из часослова (см. на утрене)

Иере́й: Ми́лостию и щедро́тами …

Хор: Ами́нь.

Канон:

Песнь 1:

Кано́н Воскре́сный, глас 7:

Хор - Ирмос: Ма́нием Твои́м/ на земны́й о́браз преложи́ся/ пре́жде удоборазлива́емое/ водно́е естество́, Го́споди./ Темже немо́кренно пешеше́ствовав Изра́иль,// пое́т Тебе́ песнь побе́дную.

Припев: Сла́ва, Го́споди, Свято́му Воскресе́нию Твоему́.

Осуди́ся сме́ртное мучи́тельство дре́вом,/ непра́ведною сме́ртию осужде́ну Ти, Го́споди:/ отню́дуже князь тьмы Тебе́ не одоле́в,// пра́ведно изгна́н бысть.

Кано́н Крестовоскре́сный, глас 7:

Припе́в: Сла́ва Господи, Кресту́ Твоему́ Честно́му и Воскресе́нию.

Два исто́чника нам на кресте́ источи́ Спас живоно́сная/ от Своего́ прободе́ннаго ребра́.// Пои́м Ему́: я́ко просла́вися.

Кано́н Богоро́дицы, глас 7:

Припе́в: Пресвята́я Богоро́дице, спаси́ нас.

Бе́здну ро́ждшая благоутро́бия, Де́во,/ ду́шу мою́ озари́ светоно́сным Твои́м сия́нием,// я́ко да досто́йно воспою́ твои́х чуде́с бе́здну.

Кано́н му́чеников, глас 4:

Припе́в: Святи́и му́ченицы, моли́те Бо́га о нас.

Со́лнца иму́ще пра́вды незаходи́ма, Христа́ Бо́га на́шего,/ просвеща́юща вас, святи́и, невеще́ственным Све́том,// о́блаки разори́те неве́дения моего́.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в, ами́нь.

Песнь 3:

Хор - Ирмос: В нача́ле Небеса́/ всеси́льным Сло́вом Твои́м утвержде́й Го́споди Спа́се,/ и Вседе́тельным и Бо́жиим Ду́хом,/ всю си́лу их,/ на недви́жимем мя ка́мени// испове́дания Твоего́ утверди́.

Припев: Сла́ва, Го́споди, Свято́му Воскресе́нию Твоему́.

Ты возше́д на дре́во,/ о нас боле́знуеши во́лею, благоутро́бне Спа́се,/ и терпи́ши я́зву, примире́ния хода́тайственну, и спасе́ния ве́рным:// е́юже Твоему́, Ми́лостиве, вси примири́хомся Роди́телю.

Припев: Сла́ва Господи, Кресту́ Твоему́ Честно́му и Воскресе́нию.

И́же на кресте́ стра́сти претерпе́вый,/ и разбо́йнику рай отве́рзый, я́ко благоде́тель и Бог,// утверди мой ум в волю Твою, едине Человеколюбче.

Припе́в: Пресвята́я Богоро́дице, спаси́ нас.

Змий поползы́й из Еде́ма,/ мене́ обоже́ния жела́нием прельсти́в, ве́рже в зе́млю:/ но И́же ми́лостив, и естество́м благоутро́бен, уще́дрив богосоде́ла,// во чре́во Твое́ все́лься, и подо́бен мне быв, Ма́ти Де́во.

Припе́в: Святи́и му́ченицы, моли́те Бо́га о нас.

Утверди́вшеся Христо́вою си́лою, всеизя́щнейшии, по́мыслом кре́пким,// сквозе́ огнь же и во́ду, стра́ждуще, преидо́сте к Небе́сным.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в, ами́нь.

Хор – катавасию на 4 глас: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве// венце́в сла́вы сподо́би.

Ектения́ ма́лая:

чтец читает:

Благочести́выя и Богоно́сныя му́ченики,/ я́ко на земли́ оста́вльшия вся,/ прия́л еси́ в наслажде́ние благи́х Твои́х и упокое́ние,/ Акинди́на, Пига́сия, Анемподи́ста,/ с ни́миже Аффо́ниа и Елпидифо́ра же,// Еди́не сый Преблаги́й. (кондак мучеников)

Отве́рзи ми уста́, Христе́ мой,/ воспе́ти и похвали́ти че́стно по́двиги страстоте́рпец Твои́х, Го́споди:/ сии́ бо, вся оста́вльше и возлюби́вше Тебе́, Созда́теля всех,/ су́щая на земли́ вся я́ко тле́нная вмени́ша./ И та́ко честны́й о́браз живоно́снаго Твоего́ Креста́ сотвори́вше,/ усе́рдно предста́ша Царю́, я́ко ору́жницы,/ му́ченицы до́блии, вопию́ще Ти:// Еди́не сый Преблаги́й. (икос)

Безбе́дно тече́ние благочести́вное, в по́двизе стра́ждуще,/ благосла́внии наде́ждею проидо́ша, венцы́ укрепля́еми;/ сопроти́вныя бо до конца́ погуби́вше,/ безпрепо́нно побе́ду свою́ соверши́ша,/ тем и оби́льно прося́щим ве́рою источа́ют всегда́ мно́жество исцеле́ний./ И́мже согла́сно возопии́м:// моли́те Христа́ Бо́га грехо́в оставле́ние дарова́ти честву́ющим любо́вию святу́ю па́мять ва́шу. (седален мучеников)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́/ и я́ко Младе́нца млеко́м пита́еши Зижди́теля и Го́спода./ Тем А́нгельский и челове́ческий род/ досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти// покланя́ющимся ве́рою пресвято́му рождеству́ Твоему́. (Богородичен минеи)

Песнь 4:

Ирмос: О́тча не́дра не оста́вль,/ и соше́д на зе́млю, Христе́ Бо́же,/ та́йну услы́шах смотре́ния Твоего́,// и просла́вих Тя, Еди́не Человеколю́бче.

Припев: Сла́ва, Го́споди, Свято́му Воскресе́нию Твоему́.

Своя́ плещи́ дав, и́же от Де́вы вопло́щься, на ра́ны, рабу́ прегреши́вшу,/ бие́н быва́ет Влады́ка непови́нен,// разреша́я моя́ согреше́ния.

Припе́в: Сла́ва Господи, Кресту́ Твоему́ Честно́му и Воскресе́нию.

Не ве́дый греха́, и его́ ра́ди быв Го́споди, е́же не был еси́ вообража́ешися,/ прие́м чу́ждее, да спасе́ши мир,// и убие́ши прельсти́в мучи́теля.

Припе́в: Пресвята́я Богоро́дице, спаси́ нас.

Избра́нная вся и до́брая,/ я́вльшися Бо́гу пре́жде созда́ния све́тлостию, Всепе́тая,// светоли́тием Твои́м пою́щия Тя просвети́.

Припе́в: Святи́и му́ченицы, моли́те Бо́га о нас.

Просвеща́еми добро́тою изя́щнейшаго страда́ния,/ све́тлии свети́льницы, му́ченицы Христо́вы яви́стеся,/ светле́йшими луча́ми озаря́юще зову́щия:// сла́ва, Христе́, си́ле Твое́й.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в, ами́нь.

Песнь 5:

Ирмос: Нощь не светла́ неве́рным Христе́,/ ве́рным же просвеще́ние в сла́дости слове́с Твои́х./ Сего́ ра́ди к Тебе́ у́тренюю,// и воспева́ю Твое́ Божество́.

Припев: Сла́ва, Го́споди, Свято́му Воскресе́нию Твоему́.

За Твоя́ рабы́ продае́шися, Христе́,/ и по лани́те ударе́ние терпи́ши,/ свобо́де хода́тайственно пою́щим:// к Тебе́ у́тренюю, и воспева́ю Твое́ Божество́.

Припе́в: Сла́ва Господи, Кресту́ Твоему́ Честно́му и Воскресе́нию.

Егда́ со беззако́нными вмени́вся, возне́слся еси́ на ло́бнем,/ свети́ла сокрыва́хуся, и земля́ колеба́шеся, и церко́вная све́тлость раздра́ся,// евре́йское явля́ющи отпаде́ние.

Припе́в: Пресвята́я Богоро́дице, спаси́ нас.

Ле́ствицу узре́в Иа́ков, к высоте́ утвержде́ну,/ о́бразу научи́ся, неискусобра́чная Тебе́:// Тобо́ю бо Бог челове́ком приобщи́ся, Всечи́стая Влады́чице.

Припе́в: Святи́и му́ченицы, моли́те Бо́га о нас.

Тя сама́го, Аффо́ние, приве́л еси́ Христу́,/ кре́пце мучи́тельскую, сла́вне, обличи́в зло́бу безбо́жную,// и к све́ту прите́кл еси́ ве́ры, веселя́ся.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в, ами́нь.

Песнь 6:

Ирмос: Пла́вающаго в молве́ жите́йских попече́ний,/ с корабле́м потопля́ема грехи́,/ и душетле́нному зве́рю примета́ема,/ я́ко Ио́на, Христе́, вопию́ Ти:// из смертоно́сныя глубины́ возведи́ мя.

Припев: Сла́ва, Го́споди, Свято́му Воскресе́нию Твоему́.

Воспомина́ху Тя заключе́нныя во а́де ду́ши, и оста́вльшияся пра́ведных,/ и от Тебе́ спасе́ния моля́хуся:/ е́же кресто́м, Христе́, по́дал еси́ преиспо́дним,// прише́д я́ко благоутро́бен.

Припе́в: Сла́ва Господи, Кресту́ Твоему́ Честно́му и Воскресе́нию.

На кресте́ возне́сся, Спа́се во́лею,/ вра́жию плени́л еси́ держа́ву,// на сем пригвозди́в грехо́вное, Бла́же, рукописа́ние.

Припе́в: Пресвята́я Богоро́дице, спаси́ нас.

Зако́ннии Тя о́бразы, и проро́ческая прорече́ния я́ве предвозвеща́ху,/ хотя́щую роди́ти благоде́теля, Чи́стая, всея́ тва́ри,/ многоча́стне и многообра́зне благоде́йствовавшаго// ве́рно воспева́ющих Тя.

Припе́в: Святи́и му́ченицы, моли́те Бо́га о нас.

Теку́щих тле́нная презре́вше,/ нетле́нная сподо́бистеся зре́ти./ Искуше́ний у́бо изба́вите и бед// ве́рою вас призыва́ющия, всехва́льнии.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в, ами́нь.

Хор – катавасия на 4 глас: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,// от Нея́ ро́ждшагося Бо́га сла́вим.

Ектения́ ма́лая:

хор поёт кондак воскресный 7 гласа (или чтец читает):

Не ктому́ держа́ва сме́ртная/ возмо́жет держа́ти челове́ки:/ Христо́с бо сни́де, сокруша́я и разоря́я си́лы ея́./ Связу́ем быва́ет ад,/ проро́цы согла́сно ра́дуются:/ предста́, глаго́люще, Спас су́щим в ве́ре,// изыди́те, ве́рнии, в воскресе́ние.

И́кос (читает чтец):

Вострепета́ша до́ле преиспо́дняя днесь,/ ад и смерть Еди́наго от Тро́ицы:/ земля́ поколеба́ся, вра́тницы же а́довы ви́девше Тя, ужасо́шася:/ вся же тварь со проро́ки ра́дующися пое́т Тебе́ побе́дную песнь,/ изба́вителю Бо́гу на́шему,/ разруши́вшему ны́не сме́ртную си́лу./ Да воскли́кнем и возопии́м ко Ада́му, и к су́щим из Ада́ма:/ дре́во сего́ па́ки введе́.// Изыди́те, ве́рнии, в воскресе́ние.

Песнь 7:

Ирмос: Пещь о́троцы огнепа́льну/ дре́вле росоточа́щу показа́ша,/ Еди́наго Бо́га воспева́юще и глаго́люще:/ превозноси́мый отце́в Бог// и препросла́влен.

Припев: Сла́ва, Го́споди, Свято́му Воскресе́нию Твоему́.

Дре́вом умерщвля́ется Ада́м, во́лею преслуша́ние соде́лав:/ послуша́нием же Христо́вым па́ки обновля́емь есть.// Мене́ бо ра́ди распина́ется Сын Бо́жий, препросла́вленный.

Припе́в: Сла́ва Господи, Кресту́ Твоему́ Честно́му и Воскресе́нию.

И́же на дре́ве кре́стнем грехо́вное жа́ло притупи́в,/ и Ада́мова преступле́ния рукописа́ние разруши́в копие́м ребра́ Твоего́,// благослове́н еси́, Го́споди Бо́же оте́ц на́ших.

Припе́в: Пресвята́я Богоро́дице, спаси́ нас.

Преиспещре́ну, позлаще́ну у́тварь Тя иму́щу/ возлюби́ Созда́тель Твой, Де́во, и Госпо́дь:// превозноси́мый отце́в Бог и препросла́влен.

Припе́в: Святи́и му́ченицы, моли́те Бо́га о нас.

Я́ко изба́вил еси́ из пла́мене три благочести́выя о́троки,/ си́це и ны́не страда́льцы в пещи́ о́гненней сохрани́л еси́,/ вопию́щия Ти Богому́дренно:// оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в, ами́нь.

Песнь 8:

Ирмос: Неопа́льная огню́ в Сина́и прича́щшаяся Купина́,/ Бо́га яви́ медленоязы́чному и гугни́вому Моисе́ови,/ и о́троки ре́вность Бо́жия/ три непребори́мыя во огни́ певцы́ показа́:/ вся дела́ Госпо́дня Го́спода по́йте,// и превозноси́те во вся ве́ки

Припев: Сла́ва, Го́споди, Свято́му Воскресе́нию Твоему́.

Пречи́стый А́гнец слове́сный за мир закла́н быв,/ преста́ви я́же по зако́ну приноси́мая,/ очи́стив сего́ кроме́ прегреше́ний я́ко Бог, при́сно зову́ща:// вся дела́ Госпо́дня, Го́спода по́йте, и превозноси́те во вся ве́ки.

Припе́в: Сла́ва Господи, Кресту́ Твоему́ Честно́му и Воскресе́нию.

Претерпе́вшаго стра́сти во́лею,/ и на кресте́ пригвожде́на хоте́нием,/ и разру́шшаго си́лы а́довы,// по́йте свяще́нницы, лю́дие превозноси́те во вся ве́ки.

Припе́в: Пресвята́я Богоро́дице, спаси́ нас.

Све́том рождества́ Твоего́,/ странноле́пно вселе́нную просвети́ла еси́, Богороди́тельнице,/ су́ща бо вои́стинну Бо́га на объя́тиях но́сиши Твои́х,/ просвеща́юща ве́рныя при́сно зову́щия:/ вся дела́ Госпо́дня Го́спода по́йте,// и превозноси́те во вся ве́ки.

Припе́в: Святи́и му́ченицы, моли́те Бо́га о нас.

Благочести́вейшее му́чеников торжество́ ра́достно прии́де,/ мир озаря́ющее вся возвесели́,/ и све́тло украша́ющее ве́рою пою́щия:// Го́спода воспева́йте дела́, и превозноси́те его́ во ве́ки.

Благослови́м Отца́, и Сы́на, и Свята́го Ду́ха, Го́спода. И ны́не и при́сно и во ве́ки веко́в, ами́нь.

Хор: Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия на 4 глас: О́троки благочести́выя в пе́щи/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся ве́ки.

Диакон: Богоро́дицу и Ма́терь Све́та в пе́снех возвели́чим.

Песнь Пресвято́й Богоро́дицы:

Хор: Вели́чит душа́ Моя́ Го́спода…

Песнь 9:

Ирмос: Нетле́ния искуше́нием ро́ждшая,/ и всехитрецу́ Сло́ву плоть взаимода́вшая,/ Ма́ти неискусому́жная Де́во Богоро́дице,/ Прия́телище Нестерпи́маго,/ Село́ Невмести́маго Зижди́теля Твоего́,// Тя велича́ем.

Припев: Сла́ва, Го́споди, Свято́му Воскресе́нию Твоему́.

И́же божеству́ страсть прилага́ющии,/ заусти́теся вси чуждему́дреннии:/ Го́спода бо сла́вы пло́тию распя́та,/ не распя́та же естество́м боже́ственным,// я́ко во двою́ естеству́ Еди́наго велича́ем.

Припе́в: Сла́ва Господи, Кресту́ Твоему́ Честно́му и Воскресе́нию.

Свет от Све́та, О́тчее сия́ние сла́вы безле́тно осия́вый,/ я́коже во тьме челове́ческому житию́ Христо́с возсия́,/ и гоня́щую прогна́ тьму:// его́же непреста́нно ве́рнии велича́ем.

Припе́в: Пресвята́я Богоро́дице, спаси́ нас.

Радости нам вечныя ходатаица и веселия явилася еси́/ Присноде́во Отроковице, Избавителя рождши,/ истиною и Ду́хом божественным Того чтущих,// я́ко Бо́га избавляющаго.

Припе́в: Святи́и му́ченицы, моли́те Бо́га о нас.

Труды́ ва́ша на земли́ Небе́сное весе́лие прия́ше,/ иде́же му́чеников ли́цы, и Боже́ственных во́инства,// и все перворо́дных сра́дуется торжество́, всеблаже́ннии.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в, ами́нь.

Хор – катавасию на 4 глас: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная,// Богоро́дице, Чи́стая Присноде́во.

Ектения́ ма́лая:

Иере́й: Я́ко Тя хва́лят вся си́лы небе́сныя, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Ами́нь.

Диа́кон: Свят Госпо́дь Бог наш.

Хор: Свят Госпо́дь Бог наш

Диа́кон: Я́ко Свят Госпо́дь Бог наш.

Хор: Свят Госпо́дь Бог наш.

Диа́кон: Над все́ми людьми́ Бог наш.

Хор: Свят Госпо́дь Бог наш.

чтец читает:

Ка́мень узре́вша отвале́н, мироно́сицы ра́довахуся,/ ви́деша бо ю́ношу седя́ща во гро́бе,/ и той тем рече́: се Христо́с воста́л есть,/ рцы́те с Петро́м ученико́м:/ на го́ру приспе́йте Галиле́йскую, та́мо вам яви́тся,// я́коже предрече́ друго́м.

(Ексапостила́рий воскре́сный второ́й)

Сла́ва Отцу́ и Сы́ну и Свято́му Ду́ху.

Акинди́на, и Пига́сия, и Елпидифо́ра венча́ем/ со Аффо́нием пе́сньми, ку́пно и Анемподи́ста,/ и́бо пе́рсскую лесть обличи́вше суему́дренную/ и бие́ния и ра́ны за Христа́ претерпе́вше,// неизрече́нныя сла́вы получи́ша. (светилен мучеников)

И ны́не и при́сно и во ве́ки веко́в. Ами́нь.

А́нгел у́бо принесе́ Де́ве, е́же ра́дуйся,/ пре́жде Твоего́ зача́тия, Христе́,/ А́нгел же ка́мень отвали́ гро́ба Твоего́,/ вме́сто печа́ли ов у́бо ра́дости неизрече́нныя зна́мения,/ ов же в сме́рти ме́сто пода́теля Тя жи́зни пропове́дуя и велича́я,// и глаго́ля воскресе́ние жена́м, и таи́нником.

(Богоро́дичен воскре́сного ексапостила́рия)

Чтец возглашает: глас седьмый, Вся́кое дыха́ние да хва́лит Го́спода.

Хор: Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Чтец: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Хор: Воскре́се Христо́с из ме́ртвых,/ разру́ш сме́ртныя у́зы:/ благовести́ земле́, ра́дость ве́лию,// по́йте Небеса́ Бо́жию сла́ву.

Чтец: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Хор: Воскресе́ние Христо́во ви́девше,/ поклони́мся свято́му Го́споду Иису́су:// еди́ному безгре́шному.

Чтец: Хвали́те Его́ в тимпа́не и ли́це,/ хвали́те Его́ во стру́нах и орга́не.

Христо́ву воскресе́нию кла́няющеся не преста́ем:/ той бо спасл есть нас от беззако́ний на́ших,/ Святы́й Госпо́дь Иису́с,// явле́й воскресе́ние.

Чтец: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

Что возда́мы Го́сподеви о всех, я́же воздаде́ нам?/ Нас ра́ди Бог в челове́цех,/ за истле́вшее естество́ Сло́во плоть бысть,/ и всели́ся в ны, к неблагода́рным, Благоде́тель:/ к пле́нником, Свободи́тель:/ ко и́же во тьме седя́щим, Со́лнце Пра́вды:/ на Кресте́, безстра́стный: во а́де, свет:/ в сме́рти, живо́т: воскресе́ние, па́дших ра́ди./ К Нему́же возопии́м:// Бо́же наш, сла́ва Тебе́.

Чтец: глас вторый, Сла́ва Отцу́ и Сы́ну и Свято́му Ду́ху.

С ми́ры прише́дшим я́же с Мари́ею жена́м,/ и недоумева́ющимся,/ ка́ко бу́дет им улучи́ти жела́ние,/ яви́ся ка́мень взят,/ и Боже́ственный ю́ноша утоля́я мяте́ж душ их,/ воста́ бо, глаго́лет, Иису́с Госпо́дь./ Те́мже пропове́дите пропове́дником Его́,/ ученико́м в Галиле́ю тещи́,/ и ви́дети Его́ воскре́сша из ме́ртвых,// я́ко Жизнода́вца и Го́спода.

Чтец: И ныне, глас тойже, И ныне и присно и во веки веков. Аминь.

Преблагослове́нна еси́, Богоро́дице Де́во,/ Вопло́щшим бо ся из Тебе́ ад плени́ся,/ Ада́м воззва́ся,/ кля́тва потреби́ся,/ Е́ва свободи́ся,/ сме́рть умертви́ся, и мы ожи́хом./ Тем воспева́юще вопие́м:/ благослове́н Христо́с Бог,// благоволи́вши та́ко, сла́ва Тебе́.

Иере́й: Слава Тебе, показавшему нам свет.

Хор: Славосло́вие вели́кое.

Хор: Тропа́рь воскре́сный (можно на 7 тропарный глас):

Днесь Спасе́ние ми́ру бысть,/ пое́м Воскре́сшему из гро́ба,/ и Нача́льнику жи́зни на́шея:/ разруши́в бо сме́ртию смерть,// побе́ду даде́ нам и ве́лию ми́лость.

Ектения́ сугу́бая:

Хор: Го́споди, поми́луй. (Трижды, на каждое прошение)