Степенна, глас 8: Ихже стихи повторяюще поем

От ю́ности моея́ враг мя искуша́ет, сластьми́ пали́т мя: / аз же наде́яся на Тя, Го́споди, побежда́ю сего́.

Ненави́дящии Сио́на, / да бу́дут у́бо пре́жде исторже́ния я́ко трава́: / ссе́чет бо Христо́с вы́я их, усече́нием мук.

Слава И ныне: Святы́м Ду́хом, Еже жи́ти вся́ческим: / Свет от Све́та, Бог Вели́к: / со Отце́м пое́м Ему́, и с Сло́вом.

Канон , Песнь 1

Ирмос: Колесницегони́теля фарао́ня погрузи́ / чудотворя́й иногда́ / Моисе́йский жезл, крестообра́зно порази́в, / и раздели́в мо́ре, / Изра́иля же беглеца́, пешехо́дца спасе́, / песнь Бо́гови воспева́юща.

Канон воскресен

Всеси́льну Христо́ву Божеству́ ка́ко не диви́мся; / от страсте́й у́бо всем ве́рным, безстра́стие и нетле́ние точа́щу, / от ребра́ же Свята́го исто́чник безсме́ртия иска́пающу, / и Живо́т из гро́ба Присносу́щный.

Яко благоле́пен жена́м Ангел ны́не яви́ся, / све́тлыя нося́ о́бразы есте́ственныя невеще́ственныя чистоты́, / зра́ком же возвеща́я свет воскресе́ния, зовы́й: воскре́се Госпо́дь.

Канон крестовоскресен.

Взя́шася врата́ боле́зненная, / и ужасо́шася вра́тницы а́довы,/ зря́ще в преиспо́днейшая Соше́дшаго, / Иже на высоте́ всех превы́ше естества́.

Удиви́шася чи́ни а́нгельстии, / зря́ще на престо́ле посажде́но Отчи, / отпа́дшее естество́ челове́ческое, / затворе́ное в преиспо́дних земли́.

Ин канон, Пресвятей Богоро́дице

Грозд Тя Живоно́сен, / всеми́рнаго иска́пающ сла́дость спасе́ния, / Де́ва, Христе́, роди́.

Род Ада́мль, ко е́же па́че ума́ блаже́нству, / Тобо́ю возведе́нный, Богоро́дице, / досто́йне сла́вит Тя.

Песнь 3

Ирмос: Утвержде́й в нача́ле Небеса́ ра́зумом, / и зе́млю на вода́х основа́вый, / на ка́мени мя, Христе́, за́поведей Твои́х утверди́, / я́ко несть свят, па́че Тебе́ / Еди́не Человеколю́бче.

Канон воскресен

Осужде́на бы́вша Ада́ма вкуше́нием греха́, / пло́ти Твоея́ спаси́тельною стра́стию оправда́л еси́, Христе́: / Сам бо непови́нен сме́ртнаго иску́са был еси́, Безгре́шне.

Воскресе́ния свет возсия́ / су́щим во тьме, и се́ни сме́ртней седя́щим, / Бог мой Иису́с, / и Свои́м Божество́м кре́пкаго связа́в, / сего́ сосу́ды расхи́тил есть.

Другий канон, крестовоскресен.

Отве́ргшагося пре́жде за́поведи, Го́споди, / изринове́на мя от Тебе́ сотвори́л еси́, / в него́же вообрази́вся, послуша́нию же навы́к, / Себе́ па́ки назда́л еси́ распя́тием.

Прему́дростию вся проуве́девый, Го́споди, / и ра́зумом Твои́м водрузи́вый преиспо́дняя, / не не сподо́бил еси́ снизхожде́нием Твои́м, Сло́ве Бо́жий, / воскреси́ти, е́же по о́бразу Твоему́.

Ин канон, Пресвятей Богоро́дице

Даждь нам по́мощь Твои́ми моли́твами, Всечи́стая, / прило́ги отража́ющи лю́тых обстоя́ний.

Еве прама́тери Ты исправле́ние бы́ла еси́, / Нача́льника жи́зни ми́рови, Христа́ Богоро́дице, ро́ждши.

Песнь 4

Ирмос: Ты моя́ кре́пость Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра Отча, / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва, Человеколю́бче.

Канон воскресен

Ты врага́ су́ща мя зело́ возлюби́л еси́: / Ты истоща́нием стра́нным соше́л еси́ на зе́млю, Благоутро́бне Спа́се, / после́дняго моего́ досажде́ния не отве́ргся, / и пребы́в на высоте́ пречи́стыя Твоея́ сла́вы, / пре́жде безче́ствованнаго просла́вил еси́.

Кто зря, Влады́ко, ны́не не ужаса́ется, / стра́стию смерть разруша́ему; / Кресто́м бежа́щее тле́ние, / и сме́ртию ад бога́тства истощава́емый, / Боже́ственною си́лою Тебе́ распя́таго; / чу́дно де́ло, Человеколю́бче!

Другий канон, крестовоскресен.

На Кресте́ Тя пригвозди́ша законопресту́пных де́ти, Христе́ Бо́же: / и́мже спасл еси́ я́ко Благоутро́бен, сла́вящия Твоя́ страда́ния.

Воскре́с от гро́ба, вся совоскреси́л еси́ су́щия во а́де ме́ртвыя, / и просвети́л еси́ я́ко Благоутро́бен, сла́вящия Твое́ воскресе́ние.

Ин канон, Пресвятей Богоро́дице

Богоро́дицу Тя, Всечи́стая, просве́щшиися вси пропове́дуем: / Со́лнце бо пра́вды родила́ еси́, Присноде́во.

Очище́ние да́руй на́шым неве́дением, я́ко Безгре́шен: / и умири́ мир Твой, Бо́же, моли́твами ро́ждшия Тя.

Песнь 5

Ирмос: Вску́ю мя отри́нул еси́ / от лица́ Твоего́, Све́те Незаходи́мый, / и покры́ла мя есть чужда́я тьма, окая́ннаго; / но обрати́ мя, / и к све́ту за́поведей Твои́х / пути́ моя́ напра́ви, молю́ся.

Канон воскресен

Оде́ятися претерпе́л еси́ в багряни́цу / пре́жде стра́сти Твоея́, Спа́се, поруга́емь, / первозда́ннаго покрыва́я безобра́зное обнаже́ние: / и наг пригвозди́лся еси́ на Кресте́ пло́тию, / совлача́я, Христе́, ри́зу умерщвле́ния.

От пе́рсти сме́ртныя, / Ты па́дшее мое́ па́ки назда́л еси́ существо́, воскре́с: / и нестаре́ющееся, Христе́ устро́ил еси́, / яви́в па́ки я́коже ца́рский о́браз, / нетле́ния жизнь блиста́ющ.

Другий канон, крестовоскресен.

Наста́ви нас си́лою Креста́ Твоего́, Христе́: / тем бо Тебе́ припа́даем, / мир пода́ждь нам Человеколю́бче.

Окорми́ живо́т наш, я́ко Преблаги́й, / пою́щих Твое́ воста́ние, / и мир пода́ждь нам, Человеколю́бче.

Ин канон, Пресвятей Богоро́дице

Утоли́ нестерпи́мую бу́рю страсте́й мои́х, / Яже Бо́га ро́ждшая, Окорми́теля и Го́спода.

Мари́е Богоро́дице Безневе́стная, / упова́ния враго́в осуети́, / и пою́щия Тя возвесели́.

Песнь 6

Ирмос: Очи́сти мя, Спа́се, / мно́га бо беззако́ния моя́,/ и из глубины́ зол возведи́, молю́ся: / к Тебе́ бо возопи́х, / и услы́ши мя, / Бо́же спасе́ния моего́.

Канон воскресен

Дре́вом кре́пко низложи́ мя началозло́бный: / Ты же, Христе́, возне́сся на Кресте́, / крепча́е низложи́л еси́, посрами́в сего́, / па́дшаго же воскреси́л еси́.

Ты уще́дрил еси́ Сио́на, возсия́вый от гро́ба, / но́ваго вме́сто ве́тхаго соверши́в, я́ко Благоутро́бен, Боже́ственною Твое́ю кро́вию: / и ны́не ца́рствуеши в нем во ве́ки, Христе́.