Евангелие от Матфеа, зачало 45.

Во вре́мя о́но, прии́де Иису́с на со́нмище иуде́йское. И се челове́к бе ту, ру́ку имы́й су́ху. И вопроси́ша Его́, глаго́люще: а́ще досто́ит в суббо́ты цели́ти? Да на Него́ возглаго́лют. Он же рече́ им: кто есть от вас челове́к, и́же и́мать овча́ еди́но, и а́ще впаде́тся в суббо́ты в я́му, не и́мет ли е́ и и́змет? Кольми́ у́бо лу́чше есть челове́к овча́те? Те́мже досто́ит в суббо́ты добро́ твори́ти. Тогда́ глаго́ла челове́ку: простри́ ру́ку твою́. И простре́, и утверди́ся цела́ я́ко друга́я.

Мф 12:9Б–13
Понедельник 5-я недели.

Евангелие от Матфеа, зачало 46А.

Во вре́мя о́но, сове́т сотвори́ша фарисе́е на Иису́са, ка́ко Его́ погубя́т. Иису́с же разуме́в оты́де отту́ду. И по Нем идо́ша наро́ди мно́зи, и исцели́ их всех. И запрети́ им, да не я́ве Его́ творя́т. Тогда́ приведо́ша к Нему́ бесную́щася сле́па и не́ма, и исцели́ его́, я́ко слепо́му и немо́му глаго́лати и гля́дати. И дивля́хуся вси наро́ди глаго́люще: еда́ Сей есть Христо́с сын Дави́дов? Фарисе́е же слы́шавше ре́ша: Сей не изго́нит бе́сы, то́кмо о веельзеву́ле кня́зе бесо́встем. Ве́дый же Иису́с мы́сли их, рече́ им: вся́кое ца́рство разде́льшееся на ся запусте́ет, и всяк град или́ дом раздели́выйся на ся не ста́нет. И а́ще сатана́ сатану́ изго́нит, на ся раздели́лся есть: ка́ко у́бо ста́нет ца́рство его́? И а́ще Аз о веельзеву́ле изгоню́ бе́сы, сы́нове ва́ши о ком изго́нят? Сего́ ра́ди ти́и вам бу́дут судии́. А́ще ли же Аз о Ду́се Бо́жии изгоню́ бе́сы, у́бо пости́же на вас Ца́рствие Бо́жие. Или́ ка́ко мо́жет кто вни́ти в дом кре́пкаго и сосу́ды его́ расхи́тити, а́ще не пе́рвее свя́жет кре́пкаго, и тогда́ дом его́ расхи́тит? И́же несть со Мно́ю, на Мя есть, и и́же не собира́ет со Мно́ю, расточа́ет.

Мф 12:14–16, 22–30
Вторник 5-я недели.

Евангелие от Матфеа, зачало 46Б.

Во вре́мя о́но, по Иису́се идо́ша наро́ди мно́зи, и исцели́ их всех. И запрети́ им, да не я́ве Его́ творя́т. Я́ко да сбу́дется рече́нное Иса́ием проро́ком, глаго́лющим: се О́трок Мой, Его́же изво́лих, Возлю́бленный Мой, Нань же благоволи́ душа́ Моя́. Положу́ дух Мой на Нем, и суд язы́ком возвести́т, не пререче́т, ни возопие́т, ниже́ услы́шит кто на распу́тиих гла́са Его́. Тро́сти сокруше́нны не прело́мит и ле́на вне́мшася не угаси́т, до́ндеже изведе́т в побе́ду суд. И на и́мя Его́ язы́цы упова́ют.

Мф 12:15–21
Суббота по Рождестве Христове.

Евангелие от Матфеа, зачало 47.

Рече́ Госпо́дь: и́же несть со Мно́ю, на Мя есть, и и́же не собира́ет со Мно́ю, расточа́ет. Сего́ ра́ди глаго́лю вам: всяк грех и хула́ отпу́стится челове́ком, а я́же на Ду́ха хула́ не отпу́стится челове́ком. И и́же а́ще рече́т сло́во на Сы́на Челове́ческаго, отпу́стится ему́, а и́же рече́т на Ду́ха Свята́го, не отпу́стится ему́ ни в сий век, ни в бу́дущий. Или́ сотворите́ дре́во добро́ и плод его́ добр, или́ сотворите́ дре́во зло и плод его́ зол, от плода́ бо дре́во позна́но бу́дет. Порожде́ния ехи́днова, ка́ко мо́жете добро́ глаго́лати, зли су́ще? От избы́тка бо се́рдца уста́ глаго́лют. Благи́й челове́к от блага́го сокро́вища изно́сит блага́я, и лука́вый челове́к от лука́ваго сокро́вища изно́сит лука́вая. Глаго́лю же вам, я́ко вся́ко сло́во пра́здное, е́же а́ще реку́т челове́цы, воздадя́т о нем сло́во в день су́дный. От слове́с бо свои́х оправди́шися, и от слове́с свои́х осу́дишися.

Мф 12:30–37
Суббота 8-я недели.

Евангелие от Матфеа, зачало 48.

Во вре́мя о́но, приступи́ша ко Иису́су не́цыи от кни́жник и фарисе́й, глаго́люще: Учи́телю, хо́щем от Тебе́ зна́мение ви́дети. Он же отвеща́в рече́ им: род лука́в и прелюбоде́й зна́мения и́щет, и зна́мение не да́стся ему́, то́кмо зна́мение Ио́ны проро́ка. Я́коже бо бе Ио́на во чре́ве ки́тове три дни и три но́щи, та́ко бу́дет и Сын Челове́ческий в се́рдцы земли́ три дни и три но́щи. Му́жие Ниневи́тстии воста́нут на суд с ро́дом сим и осу́дят его́, я́ко пока́яшася про́поведию Ио́ниною, и се бо́ле Ио́ны зде. Цари́ца ю́жская воста́нет на суд с ро́дом сим и осу́дит и я́ко прии́де от коне́ц земли́ слы́шати прему́дрость Соломо́нову, и се бо́ле Соломо́на зде. Егда́ же нечи́стый дух изы́дет от челове́ка, прехо́дит сквозе́ безво́дная ме́ста, ищя́ поко́я, и не обрета́ет. Тогда́ рече́т: возвращу́ся в дом мой, отню́дуже изыдо́х. И прише́д обря́щет пра́зден, помете́н и укра́шен. Тогда́ и́дет и по́ймет с собо́ю седмь ины́х духо́в люте́йших себе́, и вше́дше живу́т ту, и бу́дут после́дняя челове́ку тому́ го́рша пе́рвых. Та́ко бу́дет и ро́ду сему́ лука́вому.

Мф 12:38–45
Среда 5-я недели.

Евангелие от Матфеа, зачало 49.

Во вре́мя о́но, глаго́лющу Иису́су к наро́дом, се Ма́ти Его́ и бра́тия Его́ стоя́ху вне, и́щуще глаго́лати Ему́. Рече́ же не́кий Ему́: се Ма́ти Твоя́ и бра́тия Твоя́ вне стоя́т, хотя́ще глаго́лати Тебе́. Он же отвеща́в рече́ ко глаго́лющему Ему́: кто есть Ма́ти Моя́, и кто суть бра́тия Моя́? И просте́р ру́ку Свою́ на ученики́ Своя́, рече́: се ма́ти Моя́ и бра́тия Моя́. И́же бо а́ще сотвори́т во́лю Отца́ Моего́, И́же есть на небесе́х, той брат Мой, и сестра́, и ма́ти Ми есть. В день же той изше́д Иису́с из до́му, седя́ше при мо́ри. И собра́шася к Нему́ наро́ди мно́зи, я́коже Ему́ в кора́бль вле́зти и се́сти, и весь наро́д на бре́зе стоя́ше. И глаго́ла им при́тчами мно́го.

Мф 12:46–13:3А
Четверток 5-я недели.

Евангелие от Матфеа, зачало 50.

Рече́ Госпо́дь при́тчу сию́: се изы́де се́яй, да се́ет. И се́ющу ему́, о́ва падо́ша при пути́, и приидо́ша пти́цы и позоба́ша я́. Друга́я же падо́ша на ка́менных, иде́же не име́яше земли́ мно́ги, и а́бие прозябо́ша, зане́ не име́яше глубины́ земли́. Со́лнцу же возсия́вшу присвя́нуша, и зане́ не име́яху коре́ния, изсхо́ша. Друга́я же падо́ша в те́рнии, и взы́де те́рние и подави́ их. Друга́я же падо́ша на земли́ до́брей и дая́ху плод, о́во у́бо сто, о́во же шестьдеся́т, о́во же три́десять. Име́яй у́ши слы́шати да слы́шит.

Мф 13:3Б–9
Пяток 5-я недели.