Ин канон, крестовоскресный. Иже на свое́ ра́мо заблужда́емое овча́ взе́мшему

Иже на свое́ ра́мо заблужда́емое овча́ взе́мшему, / и низложи́вшему дре́вом его́ грех, / Христу́ Бо́гу возопии́м: / воздви́гнувый рог наш, свят еси́, Го́споди.

Возве́дшему Па́стыря Вели́каго из а́да Христа́, / и священнонача́лием Его́ апо́столы я́ве язы́ки упа́сшему, / и́стиною и Боже́ственным ве́рнии Ду́хом да послу́жим.

Ин канон, Богородице

Облак Тя ле́гкий нело́жно, Де́во, имену́ем, / проро́ческим возсле́дующе рече́нием: / прии́де бо на Тебе́ Госпо́дь / низложи́ти еги́петския пре́лести рукотворе́ния, / и просвети́ти сим служа́щия.

Тя запеча́танный вои́стинну лик проро́ческий исто́чник, / и заключе́нную дверь именова́, де́вства Твоего́, Всепе́тая, / я́вственне зна́мения нам пи́шуще: / е́же сохрани́ла еси́ и по рождестве́.

Песнь 4

Ирмос: Го́ру Тя благода́тию Бо́жиею приосене́нную, / прозорли́выма Авваку́м / усмотри́в очи́ма, / из Тебе́ изы́ти Изра́илеву провозглаша́ше Свято́му, / во Спасе́ние на́ше / и обновле́ние.

Канон воскресный

Кто сей Спас и́же из Едо́ма и́сходя, вене́ц нося́ терно́вен, / очервле́нну ри́зу имы́й, на дре́ве ви́ся; / Изра́илев есть Сей Святы́й, / во Спасе́ние на́ше и обновле́ние.

Ви́дите лю́дие непокори́вии, и устыди́теся: / Его́же бо я́ко злоде́я вы вознести́ на крест у Пила́та испроси́сте умовре́дне, / сме́рти разруши́в си́лу, боголе́пно воскре́с из гро́ба.

Ин канон, крестовоскресный

Кто Сей красе́н из Едо́ма, / и Сего́ очервле́ние ри́зное, от виногра́да восо́рска, / красе́н я́ко Бог, / я́ко челове́к же, кро́вию пло́ти ри́зу очервле́ну нося́; / Ему́же пое́м ве́рнии: / сла́ва си́ле Твое́й, Го́споди.

Христо́с бу́дущих благ я́влься Архиере́й, / грех наш разори́л есть: / и показа́в стра́нен путь Свое́ю кро́вию, / в лу́чшую и соверше́ннейшую вни́де ски́нию, / Предте́ча наш во свята́я.

Ин канон, Богородице

Слы́ши чуде́с не́бо, и внуша́й земле́, / я́ко Дщи пе́рстнаго у́бо па́дшаго Ада́ма, Бо́гу нарече́на бысть, / и Своему́ Соде́телю Роди́тельница, / на Спасе́ние на́ше и обновле́ние.

Пое́м вели́кое и стра́шное Твое́ та́инство, / преми́рных бо утаи́вся чинонача́лий, / на Тя Иже сый сни́де я́ко дождь на руно́, Всепе́тая, / на Спасе́ние нас пою́щих Тя.

Песнь 5

Ирмос: Просвети́вый сия́нием прише́ствия Твоего́, Христе́, / и освети́вый Кресто́м Твои́м / ми́ра концы́, / сердца́ просвети́ / све́том Твоего́ Богоразу́мия, / правосла́вно пою́щих Тя.

Канон воскресный

Па́стыря овца́м вели́каго и Го́спода, / иуде́и дре́вом кре́стным умертви́ша: / но Той я́ко о́вцы, ме́ртвыя, во а́де погребе́нныя, / держа́вы сме́ртныя изба́ви.

Кресто́м Твои́м мир благовести́в, / и пропове́дав пле́нным, Спа́се мой, оставле́ние, / держа́ву иму́щаго посрами́л еси́, Христе:́ / на́га, обнища́вша показа́вый Боже́ственным воста́нием Твои́м.

Ин канон, крестовоскресный

О бога́тство, и глубино́ прему́дрости Бо́жия! / Прему́дрыя объе́мляй Госпо́дь, / от сих кова́рства изба́вил есть нас: / пострада́в бо во́лею не́мощию плотско́ю, / Свое́ю кре́постию, животворя́й ме́ртвыя воскреси́л есть.

Бог сый соединя́ется пло́ти нас ра́ди: / и распина́ется, и умира́ет: погреба́ется, и па́ки воскреса́ет, / и восхо́дит све́тло с пло́тию Свое́ю Христо́с ко Отцу́: / с не́юже прии́дет, и спасе́т благоче́стно Тому́ служа́щия.

Ин канон, Богородице

Веселя́тся небе́сныя си́лы зря́ще Тя: / ра́дуются с ни́ми челове́ков собра́ния: / Рождество́м бо Твои́м совокупи́шася, Де́во Богоро́дице, / е́же досто́йно сла́вим.

Да дви́жатся вси язы́цы челове́честии и мы́сли, / к похвале́ челове́ческаго вои́стинну удобре́ния, / Де́ва предстои́т я́ве сла́вящи, / ве́рою Тоя́ пою́щих чудеса́.

Песнь 6

Ирмос: Обы́де нас после́дняя бе́здна, / несть избавля́яй, / вмени́хомся, / я́ко о́вцы заколе́ния, / спаси́ лю́ди Твоя́, Бо́же наш, / Ты бо кре́пость немощству́ющих и исправле́ние.

Канон воскресный

Согреше́нием первозда́ннаго, Го́споди, лю́те уязви́хомся, / ра́ною же исцели́хомся Твое́ю, / е́юже за ны уязви́лся еси́, Христе́: / Ты бо кре́пость немощству́ющих и исправле́ние.

Возве́л ны еси́ из а́да, Го́споди, / ки́та уби́в всея́дца, Всеси́льне, / Твое́ю держа́вою низложи́в того́ си́лу: / Ты бо Живо́т, и Свет еси́, и Воскресе́ние.

Ин канон, крестовоскресный

Ум сый безстра́стен и невеще́ствен, / примеша́ется Христо́с Бог челове́ческому уму́, / хода́тайствующему Боже́ственным естество́м, пло́ти же дебельство́м, / и всему́ мне непрело́жен весьма́ соедини́ся: / да Спасе́ние всему́ мне па́дшему пода́ст распина́емь.

Па́дает прельсти́вся Ада́м, и запя́выйся сокруша́ется, / наде́ждою обо́лган сый дре́вле обоже́ния: / но востае́т соедине́нием Сло́ва обожа́емь, / и стра́стию безстра́стие прие́млет, / на престо́ле я́ко Сын сла́вится, / седя́й со Отце́м же и Ду́хом.

Ин канон, Богородице

Воплоти́ся пре́жде сый Безпло́тен, Сло́во из Тебе́, Пречи́стая, / вся́ческая во́лею творя́й, / безтеле́сных во́инства приведы́й от небытия́, я́ко Всеси́лен.

Умерщвле́н бысть враг живоно́сным Твои́м плодо́м, Богоблагода́тная: / и попра́н бысть ад проявле́нне, / и и́же во у́зах свободи́хомся. / Те́мже вопию́: стра́сти разруши́ се́рдца моего́.

Ектения, Кондак, глас 1:

Воскре́сл еси́, я́ко Бог, из гро́ба во сла́ве, / и мир совоскреси́л еси́; / и естество́ челове́ческое я́ко Бо́га воспева́ет Тя, и смерть исчезе́; / Ада́м же лику́ет, Влады́ко; / Ева ны́не от уз избавля́ема ра́дуется, зову́щи: / Ты еси́, Иже всем подая́, Христе́, воскресе́ние.

Икос:

Воскре́сшаго тридне́вно воспои́м я́ко Бо́га Всеси́льна, / и врата́ а́дова сте́ршаго, / и я́же от ве́ка из гро́ба воздви́гшаго,/ мироно́сицам я́вльшагося, я́коже благоизво́лил есть, / пре́жде сим е́же ра́дуйтеся, реки́й: / и апо́столом ра́дость возвеща́я, я́ко Еди́н Жизнода́вец. / Те́мже ве́рою жены́ ученико́м зна́мения побе́ды благовеству́ют, / и ад стене́т, и смерть рыда́ет: / мир же весели́тся, и вси с ним ра́дуются. / Ты бо по́дал еси́, Христе́, всем Воскресе́ние.

 

Песнь 7

Ирмос: Тебе́ у́мную, Богоро́дице, пещь / разсмотря́ем, ве́рнии, / я́коже бо о́троки спасе́ три Превозноси́мый, / мир обнови́, / во чре́ве Твое́м всеце́л, / хва́льный отце́в Бог и препросла́влен.

Канон воскресный

Убоя́ся земля́, сокры́ся со́лнце, и поме́рче свет, / раздра́ся церко́вная боже́ственная заве́са, / ка́мение же разсе́деся: / на кресте́ бо ви́сит Пра́ведный, / Хва́льный отце́в Бог, и препросла́влен.

Ты быв а́ки безпомо́щен, / и уя́звен в ме́ртвых во́лею нас ра́ди / превозноси́мый, вся свободи́л еси́, / и держа́вною руко́ю совоскреси́л еси́, / хва́льный отце́в Бог, и препросла́влен.